جاران بسکت
لکی شۆڕی شۆڕەبی بوو
کە دەهاتم
لەژێر سێبەری ئەودا دەحەسامەوە
بەڵام ئێستا
لەسەر ڕنوو بەفری ساردی ئەمساڵەوە
بسکەکانت گوڵە گەنمن
کەروێشکەیانە بە شنەی شەماڵەوە
لە فۆلکلۆرەوە
مەریوانی نیم
تۆی
مەریوانی
بەڵام بەو حاڵەش
ڕانەکەت دانێ
سەر
بخەمە بانی
بۆ سروودخوێنێک:
تۆ لەکوێ داهێنەر و ڕاهێنەری
جەردەی دڵی
چەتەی ڕۆحی
ڕفێنەری
شێوێنەری
لەپەڕاوێزی شێعری خاتوونێکدا
"دیسان باران بەسەرباندا دێتە خوارێ
دیسان پۆلێک کۆتری سپی
وێکڕا هەڵفڕین بە جارێ"
بەڵام ڕەنگە تۆ نەزانی
ئەم بارانە ڕێژنەی چاوی ئەوینێکە
وا بە لێزمە دادەبارێ
ئەو کۆترانەش ڕۆحی شەرمنی دڵدارێ
بەڵام ئەوان
دانەخۆرەی دانەی خاڵی سەر سینگی تۆن
هەر دێنەوە
جێی تریان کە نییە بڕۆن
١٣٧٧
