شێرە، شێراو، یان شێرەی ئاوێ قفڵێکە کە لەسەر لوولە یان دەفر و عەمباری ئاوێ قایم دەکرێ و بە هۆی پێچ یان برغوویەک گۆنگەی ئاوەکە دەبەسترێ
یان دەکرێتەوە. لە باشوور ناوەکەیان لە زمانی عەرەبی وەرگرتووە و بەلووعە یان حەنەفی
پێ دەڵێن. لە باکووریش وشەی شموسلووخ یان موسلوخ‌یان لە تورکی وەرگرتووە. لە ئێران فارسەکان "شیر" و "شیر آب"ی پێ دەڵێن و بەسەرهاتێکیان بۆ ساز کردووە کە
گۆیا بازرگانێک لە تاران یەکەم جار ئەو جۆرە قفڵەی لە شێوەی سەری شێردا هاوردە کردووە و بەو
جۆرە ناوی "شیر آب"ی لەسەر داندراوە بەڵام ئەوە ئەگەر ڕاستیش بێ، تەواو نییە.
وشە یان ناوی
"شێرە" و "شێرەی ئاو" لە ئۆستوورە یان مێتۆلۆژیی ئاوی دانیشتوانی ناوچەکە، وەرگیراوە. ئۆستوورەکە دەڵێ شێر بەری ئاوی لە ئاوەدانی گرتبوو و
لاوێکی ئازا دەبوو بچێ بیکوژێ و ئاوەکە ئازاد بکا و بەم جۆرە خەڵکی شار لە قڕبوون و تینوێتی ڕزگار بکا. لە بەیتی لاس و خەزاڵدا باوکی لاس شێڕەکە دەکوژێ و بەوەش دەبێ بە پاڵەوانی گەلی خۆی. دواتر هەر لەسەر کەوڵی ئەو شێرە لاس وەزگی دایکی دەکەوێ و بەو جۆر بە پاڵەوانی لەدایک دەبێ.
ئۆستوورەی ئاو لەڕێی ئایینی میترایی‌یەوە پەلی بۆ ڕۆژئاواش هاویشت و هەتا ئێستاش لە شارەکاندا زۆر
جار پەیکەری شێرێک دەبیندرێ کە ئاو لە دەمیەوە قەڵبەزەی بەستووە کە ئاماژە
بەو ئۆستوورەیەیە.
