لاوژە ، لاوک

لاوژە سواوی وشەی تێکەڵاوی "لا/وێژە"یە. بە واتای کەسێک کە پیشەی گۆرانی گوتن نییە بەڵام جار و بار دەیڵێ، هێندێکی لێ دەزانێ، لا وێژە. لە ناو کورد دا مەرج نییە هەموان گۆرانیبێژ و دەنگخۆش و چاکوێژ بن بەڵام زۆر کەس کەم و زۆر گۆرانی دەزانێ و لە کاتی کار یان حەسانەوەدا گۆرانی بۆ دڵی خۆی یان بۆ کۆمەڵی دۆستان و دەوروبەری دەڵێ. واتە "لا وێژە". 
لاوژە زیاتر لە وشەی تێکەڵاوتری "گەڕەلاوژە" دا باوە. گەڕی گۆرانی گوتنی ئەوانەی پیشەیان گۆرانی گوتن نییە و لاوێژن. 
وشەکانی لاوژە و لاوک لێک جیاوازن و یەک بنەمای هاوبەشیان نییە. لاوک دەگەڕێتەوە سەر کرداری لاواندنەوە بە واتای پێداهەڵگوتن یان گۆرانی بۆ ئارام کردن و هێور کردنەوە.