ئەو ساڵە ڕێگامان لە دەوروبەری شاری مەهاباد کەوتبوو. ئێواران گوندەکانمان بەسەر دەکردەوە و پاش چەند کاتژمێر مانەوە، چەند کاتژمێریش ڕێگامان دەبڕی تا سەرەنجام لە نێو دۆڵێک، ئەشکەوتێک، ڕەوەزە بەردێک یان پۆلە دارێکدا تا ئێوارەی ڕۆژی دواتر بارگەمان دەخست.
شەو تاریک داهاتبوو کە گەیشتینە سەر باسکی بەسری. بەردە هەڵۆ بەسەر شاری مەهاباددا دەیڕوانی. بۆ سەیری نێو شار و چراخانەکەی دانیشتین. دەمێک بوو لێی دوور کەوتبووینەوە و بە دیتنەوەی دووبارەی، شاگەشکە ببووین. هێشتا شەو ڕانەکشابوو و شەقامەکان لە جووڵە نەکەوتبوون. چراکان لەگەڵمان چاوبڕکێیان دەکرد. گەڕەک و شەقامەکانمان دەناسیەوە و پێشانی یەکترمان دەدا. شار گەورە ببۆوە. زانستگای لێ دامەزرابوو و شەقامی پانتر و درێژتری پێدا ڕاکێشرابوو. ئەوانەی زووتر هاتبوونە دەر، چاکیان نەدەناسیەوە. عەلی لەوانە بوو کە زووتر بە جێی هێشتبوو. رەنگە لە هەموومان زیاتر بۆ دیداری ئەو شارە خۆشەویستە بە تاسە بوو. وەک من مناڵی لادێ نەبوو کە هەمووی چەند ساڵێکی لێ ژیا بێ. ئەو هەموو بیرەوەرییەکانی سەردەمی منداڵی و لاوەتیی خۆی لە کووچە و کۆڵانەکانی ئەو شارەدا لێ زیندوو ببۆوە. لە کاتێک دا ئێمە هەر تەماشامان دەکرد و ناوی گەڕەک و شەقام و بینا گەورەکانمان بۆ یەکتر هەڵدەدا، ئەو نوقمی تەماشا بوو. لەپڕ بە دەم هەناسەیەکی قووڵەوە گوتی: ئەرێ کوڕینە بڵێی ئێمە لە هەموو خەڵکی ئەو شارە ئاقڵتر بین وا وە کێوان کەوتووین؟!
هێندێک لە کوڕەکان پێکەنین. هێندێکیان وڵامیان دایەوە و بەشێکیش بێدەنگ بوون. ڕەنگە وەک من کە لەو کاتەوە هەتا ئیستا، بە سەدان و رەنگە هەزاران جار ئەو یادەو ئەم قسەیە لە مێشکمدا هاتووەو چووەو قەت وڵامێکی یەکلاکەرەوەم بۆ نەدۆزیەوە کە لانیکەم خۆم قەناعەتی پێ بکەم.
دەرەنجامی نەدۆزینەوەی وڵام بۆ ئەو پرسیارە ئەوە بوو کە دوای ئەوەی حیزب لە سەر کێوان دایپەڕاندین، من رووم لە شاریش نەکردەوە. چارەنووس هێنامی و لە فینلاند، لەو سەری دنیا بە عەرزێی دادام. بەڵام دڵم هەر لەو شارە و هەر وا بەو کێوانەوەیە. زۆربەی هاوڕێکانی ئەو شەوەش چارەنووسی نیزیک لە منیان هەبوو بەڵام عەلی سەرەڕای خوڵقاندنی ئەم پرسیارە کە خوا دەزانێ لە کەنگێوە لە مێشکی دا دەهات و دەچوو و ئەو شەوە دەریبڕی، بە هیوای دیداری بە ئازادیی شارەکەی، مایەوە. مخابن، دەستی رەشی داگیرکەر مەودای نەدا و لە شەوی یەلدای ٢٠١٦، تێکەڵ بە کاروانی سووری هاوڕێیانی شەهیدی بوو.
رۆحت شاد عەلی گیان
