گێژاو

 لەو ڕۆژەوە

کە تۆ وەک ماسیەکی سرک

جێت هێشتم و دوور بوویتەوە

تاساوێکم

لە ناو دەریای تووڕەی خەیاڵی دووریتا

دەخولێمەوە

لە گەڵ گێژی شەپۆلەکان

دێم و دەڕۆم و دێمەوە

حەز ناکەم بە خەیاڵیش بێ

چرکەیەک لێت دوور ببمەوە 

پیروەلی باغی – ساڵی ١٣٧١

تاسە

 

دڵم تەنگ و ژیانم بێت کپ و مات                لە دووری تۆیە هیندە تاڵە ژینم

بۆ پێم ناڵێی دڵی تۆ چی بە سەر هات              کە بێ ڕووناکییە ئاسۆی ئەوینم

نەبوو جارێ کە تێر بم لە تەماشات                 وەرە با پڕ بە دڵ باڵات ببینم

هەموو کات چاوەڕوانی تۆم، بە ئاوات              بکەی مەڵهەم بە ماچێکت برینم

هاتنت لێـــم بۆتەوە ڕۆژی نەهات                   چ بێزارم لە تەنیایی ســــــەرینم

پیروەلی باغی – هاوینی ١٣٧١

بۆ جوانێک

نازت گەلێ جوانن بە خرینگەی بازن

چاوت کە دوو ڕاوچین لەسەرم هی بازن

کەشم و نەشم و لار و لەنجەت ڕێکن

پێشخزمەتی جوانیتن و مەستی نازن

ماندووم، لەبۆ ئۆخژنێ هاتوومەتە لات

چ بکەم کە مژۆڵت لە دێدا مومتازن

هەوا تووشە لە چیا، من نیگەرانی ڕێمە

شەڕەبا و بەفر و کڕێوە لە ڕێدا پێشوازن

شەو درەنگە و وەخت تەنگە دەبێ هەستین و بڕۆین

ئەگینا جوانی دەم و لێو و مەمت دڵخوازن

١٣٧٤ ناوچەی مەهاباد

شێعر و مۆسیقا

 دەڵێن هەتاو گۆیەک گڕە و

کەس ناتوانێ خۆی لێ بدا

دەڵێن ئاسمان هێندە دوورە

کەس نەبووە دەستی پێی بگا

کەچی سەیرە

من گەلێ جار

بە هاوڕێیی سۆزی شێعر و

دەنگی پیرۆزی مۆسیقا

نەک دەستەملانی هەتاو بووم

تا ئاسمانی حەوتەمیش چووم

مەهاباد – ٥/٣/١٣٧٠