تا کەوتە سەر یادی ئەوین
بە یادی شێعر کەوتەوە
لەیلا
بۆیە ئێستا گڕوو دەگرێ
وەک مناڵ بۆ بووکەشووشە
ئەویش هەر شێعری لێم دەوێ
تا کەوتە سەر یادی شێعر
ئەوینی وەبیر کەوتەوە
لەیلا
شەو
شا شێعرێکی لە سەر لەپی
دەستمی نەخشاند
کاتێ دەستی
وەکوو شێعرێکی پەنجەیی
دە پەنجەکانمدا خزاند
بەو جۆرە ئەو وەفاداری
بە شێعر و ئەوین و من
سەلماند
کۆیە – ٣ی خەزەڵوەری ١٣٧٢
هیندە گەورەی
هێندە بەرزی
هیند پیرۆزی
ڕووبار کڕنۆشت بۆ دێنێ
شاخ سەری بۆت دادەنوێنێ
"چیا" لاوکت بۆ دەڵێ
"چیمەن" گوڵاڵەت بۆ دێنێ.
هیند پیرۆزی
وەکوو ئاسمان.. وەکوو هەتاو
بووی بە ڕووگەی زەحمەتکێشان
بە گوڵ.. بە ئاو..
ئەوانە هەموو بوون بە تۆ و
تۆ
هەموانی
کاتێ کە هەژاران دەڵێن
تۆ شەهیدی کوردستانی
تۆ شەهیدی ڕێگای ڕزگاریی ئەوانی
١٣٧٢ – ناوچەی مەهاباد
***
١
لە سەر زام و برینتانا
ڕزگاربوونی دیلەکانی
ئەم کوردستانە دەبینم
لە نێو ڕووباری
خوێنتانا
سەربەخۆیی ئەم نیشتمانە
دەبینم
وەک چۆن هەموو بەیانییەک
بە ئاسۆی ئەرخەوانی‌ڕا
دڵنیام کە شەو ڕادەبرێ
دڵنیام کە هەتاو هەڵدێ
٢
ئێوە هیچکات بیر ناچنەوە
تا گوڵاڵە و نواڵەی کوێستان
لە بن بەردە یاخییەکان بڕوێنەوە
هەتا تفەنگ
شەوانە سەر وەسەر سەرینی بەرد بکا
یادتان هەورە و
لە گشت وەرزی ژیانماندا پەڵە دەدا
١١/٣/١٣٧٢ (لە ژمارە ٦١ی گۆڤاری لاواندا بڵاو
کراوەتەوە)
هەر کاتێ کە مناڵانی قژ
ئاڵۆزی ئەم هەرێمە
بە بەر دەرکی مقەڕدا
دێن و ڕادەبرن
تۆ دەبینم
وەکوو ئەوان
دارێکت کردووە بە ئەسپ
و
یاخی یاخی دەیڕەتێنی
قۆچەکانی بووە بە چەکت
و
دوژمنانی ئەم وڵاتە لە
بن دێنێ.
هەر کاتێک کە مناڵانی
قژ کاڵی ئەم هەرێمە
کتێبە قاچاخەکانیان
دەخەنە بن هەنگڵیان و
بەرەو فێرگە ڕێگە دەبڕن
تۆ دەبینم
وەکوو ئەوان
قەڵەمت کردوە بە نەشتەر
بیدەی لە چاوی دوژمنان
پەیتا پەیتا
ئینشاکەی ناو
دەفتەرەکەت دەخوێنیەوە بۆ هاوڕێکان
بۆیان دەدوێی
لە ئازادی
لە کوردستان
لە شەهیدان
هەر کاتێ کە مناڵانی قژ
ئاڵۆزی ئەم هەرێمە
لە ناو باخە یاخییەکان
وەک کارژۆڵە ئاسکی جوان
بە ڕمبازی و تەقڵەسەما
دەچنە سەر تاتە
بەردەکان
دێنەوە خوار
دەتبینم و خۆم لا دەدەم
تا نەکا دنیای مناڵیت
بشێوێنم
بەڵام دەنگە خۆشەکەت
هەر لە گوێمدایە؛
"کاکە! گەر لە شار هاتیەوە
تفەنگێکم بۆ
بێنەوە!"
هیوا گیان! کاتێ
دێمەوە
ئیدی تفەنگەکان خەوتوون
نێرگزەکان دەڕوێنەوە
ئەو کاتە من کتێبێکت بۆ
دێنمەوە
پڕ بێ لە وشەی کوردیی
جوان
گەر بێمەوە..
ئەستێرۆکان –
٢٠/٢/١٣٧٢
(١)
کانی
کاتێ کانی
بە سیمان و بیتۆن کوێر بوو
پەلی کوتا
ڕەگی نەمامی
بەر دەمی خۆی دۆزیەوە و
ئاوی دایە
تا نەمام
بوو بە بێشەڵان
بێشەڵانیش
بوو بە پەنای تێکۆشەران
قەڵا
سینگم وەک
قەڵای دمدمە
دڵت هاتۆتە
ناو دڵم و
تا ئەوینتم
لە گەڵدا بێ
هیچ هەباسێ
بۆی ناکرێ
کانی مەمکتم لێ هەڵبڕێ
بۆ
هاوڕێم س.م
گیانە تۆ
وەرە بۆم بدوێ
من ئەوینداری
وشەتم
شاگردێکی ڕانەهاتوو
بۆ پێوانی
ڕێی ڕابردوو
تۆ پێم بڵێ
کە لەم شارە
غەریبەدا
هەتاو لە
کام ئاسۆ هەڵدێ
لەم وڵاتە قاقڕەدا
ئازادیمان چۆن
بەر دەگرێ
کچانی وڵاتی
ئێمە
چۆن بە
خەندە
زەردایی سەر
ڕووی هەژاران
دەخەنە سەر
لێوی خۆیان
وڵات پڕ
دەکەن لە زەردە
دە بۆم بدوێ
مەڵێ تۆ
بەرۆکم بەردە
تا بزانم
شلکە نەمامی ئازادی
چۆن لە
حەوشەی ئێمەش دەڕوێ
ورمێ
– ١٠/١٢/١٣٧١
گەر شەوان
شێعرت بۆ نەڵێم
خەم و کەسەر
لە نێو دڵم
ناچێتە دەر
هەموو شەوێ
هێندەی زامی
دڵی مەجنوون
بە قەت
ئەوینی قەد بێستوون
لە دڵڕا
شێعرت بۆ دەڵێم
تا تاریکی و
کەسەر و خەم
لە نێو دڵدا
ڕەجم بکەم
ورمێ
– ١١-١٢/١٠/١٣٧١
ناسکۆڵەکەی
ئاوارەی ناو شاری غەریب
ئەمڕۆ لێرە
لە سەر
ڕێبازی هاتوچۆت
چاو
چاوەڕوان چاوەڕێتم
ئەگەر هاتی
لێم ون نەکەی ڕوخساری خۆت.
ناسکۆڵەکەی
پەڕیوەی ناو شاری دووکەڵ
شاری دیلی..
شاری کۆت
ئەمڕۆ لە
رێگای هاموشۆت
وەستاوم و
ئەم شێعرەم دەهۆنمەوە بۆت
شێعری
غوربەت.. شێعری تاسە
شێعرێک بە
تەمی هەناسە
بۆکان
– ڕەزبەری ١٣٧١
بۆ یەک کات
بوو
وەکوو خۆری
دەمەو ئێوار
تۆ ئاوا
بووی لە چاوانی منی خەمبار
بۆ یەک کات
بوو
تۆ بە
شنەبای لەنجە و لار
دنیای
زستانیی ئەوینمت
گۆڕی بە
وڵاتی بەهار.
بۆ یەک کات
بوو
چاوم
فرمێسکی تیا نەما
بووی بە عیسای
دڵی مردوو
خەمەکانمت
دا بە دەم با
بۆ یەک کات
بوو
بووی بە
ئەستێری یادی من
چاوەکانم
هەتا هەبن
وەک سێنی
سینەمایەکن
تۆ تاکە
ئەکتەری ئەوێی
ئەی پاکترین
ئاواتی من
ورمێ
– ٢١/٩/١٣٧١
لەو ڕۆژەوە
کە تۆ وەک
ماسیەکی سرک
جێت هێشتم و
دوور بوویتەوە
تاساوێکم
لە ناو
دەریای تووڕەی خەیاڵی دووریتا
دەخولێمەوە
لە گەڵ گێژی
شەپۆلەکان
دێم و دەڕۆم
و دێمەوە
حەز ناکەم
بە خەیاڵیش بێ
چرکەیەک لێت
دوور ببمەوە
پیروەلی
باغی – ساڵی ١٣٧١
دڵم تەنگ و
ژیانم بێت کپ و مات لە دووری تۆیە هیندە تاڵە ژینم
بۆ پێم
ناڵێی دڵی تۆ چی بە سەر هات کە بێ ڕووناکییە ئاسۆی ئەوینم
نەبوو جارێ
کە تێر بم لە تەماشات وەرە با پڕ بە دڵ باڵات ببینم
هەموو کات
چاوەڕوانی تۆم، بە ئاوات بکەی مەڵهەم بە ماچێکت برینم
هاتنت لێـــم بۆتەوە ڕۆژی نەهات چ بێزارم لە تەنیایی ســــــەرینم
پیروەلی باغی – هاوینی ١٣٧١
نازت گەلێ جوانن بە خرینگەی
بازن
چاوت کە دوو ڕاوچین لەسەرم
هی بازن
کەشم و نەشم و لار و لەنجەت
ڕێکن
پێشخزمەتی جوانیتن و مەستی
نازن
ماندووم، لەبۆ ئۆخژنێ
هاتوومەتە لات
چ بکەم کە مژۆڵت لە دێدا مومتازن
هەوا تووشە لە چیا، من
نیگەرانی ڕێمە
شەڕەبا و بەفر و کڕێوە لە
ڕێدا پێشوازن
شەو درەنگە و وەخت تەنگە
دەبێ هەستین و بڕۆین
