کۆچ

 

پێم نەوتی؛ دەستت بخەرە ناو دەستم؟!

شەو تاریکە با هەڵنەبڕێی

تەوەللابوونت گرانە

زامی دووریت بێ دەرمانە.

 

نەموت تۆ لەگەڵیان مەڕۆ؟!

ئەوانە گشت هاوڕێی ڕۆژ و جەردەی شەون

هەڵاتووی دەستی ڕۆژگارن

بۆ تاریکی ڕێ دەکەون.

 

گوڵم ئێستاش درەنگ نییە

مەڕۆ و باڵات بە باڵای شوومی وان مەبڕە

نەکا ڕۆژێ بە قاچاخی دەتبینمەوە

شلکە نەمامی باڵاکەت

کەوتبێتە ژێر چارشێوی ڕەشی خاوەنماڵ

لە تیشکی چاوی سەرشێتم بێ بەریت کەن

دەستەونزا ڕابوەستم

تاکو چارشێو لەسەر باڵای تۆش ڕاماڵێ شنەی شەماڵ

 

مەڕۆ..مەڕۆ

دەستت بخەرە ناو دەستم

شەو تاریکە با هەڵنەبڕێی

تەوەللا بوونت گرانە

زامی دووریت بێ دەرمانە

لەگەڵ ئەوان

بۆ کوێ بچی و لەهەر کوێ بی

هەمان ڕەنگ و هەمان شکڵە

                      ئەم ئاسمانە

                                     فێرگەی حیزب ٢٩/٧/١٣٧٥

بێزاری*

 

پەنجەرەکەم

 تەمی هەناسەی هەناومی لێ نیشتووە

سارد بۆتەوە و

بە سەر شووشە ناسکەکەیدا

وەک فرمێسکی سەر ڕوومەتی کیژۆڵەیەکی دڵ بە سۆ

هۆن هۆن دادەڕژێتە خوارێ

لە دەرەوە؛

زەوی بە تیشکی ساردی خۆر داپۆشراوە

من دەمێکە

چاوەڕوانی دابارینی تا ئەژنۆیان بەفر دەکەم

دە با چیتر کێڵگەکانمان بە وشکە سەرما سڕ نەبن 

                   ١٣٧٥

* دژ بە شەڕی ناوخۆ لە باشوور نووسراوە

هەوری نەزۆک *

 

لەمبەر ئەوبەری قەرەچووخ

دوو لەشکری ڕەشی هەور لە سان دران

شاخ پێکەنی

کانی مەستی بادەی باران

زەوی بە تەمای ساڵێکی پڕ فەڕ و هات

داوەتیان گرت

بەڵام هەورەکان نەزۆک بوون

لە مەمکی قوت و بەتاڵیان

تاکە دڵۆپێکیش نەهات

                 ١٣٧٥ کۆیە

* دژ بە شەڕی ناوخۆ نووسراوە

زەردەزێڕینە

شلێرۆکە قژ کاڵی من

ئەی چاوشینی خنجیلانە

گەر هاتمەوە

بەرلەوەی کە ئامبازم بی

بەرلەوەی کە

باسکی ناسکی مناڵانەت

لە دەوری ئەژنۆم وەرێنی

خەندەی شیرینی مناڵیت

بە گوێچکەما بچرپێنی

پێم خۆشە مەینەت و ژانی ڕۆژانی دووریت بۆ باس کەم.

 

بەرلەوەی کە

بۆنی بسکی سەوزت بکەم

گوێ بۆ قسەی شیرینی مناڵیت شل کەم

بە بەژنی وردت هەڵبڵێم

لە دەریای فرمێسکی دووریی خۆم بۆت دەدوێم.

 

شلێرۆکی قژ زەردی من

ئەی ناسکتر لە شێعری زەردە زێڕینە

گەر هاتمەوە

پێش هەموو شت بیرم خەوە

بۆ یەکەم جار

باسی ئەمڕۆمت بۆ بکەم

کە شێعری زەردە زێڕینەم هاتە سەر زار

کۆیە – ٢٢/١٢/ ١٣٧٤

تەون

 

نە شەوێکن..

        نە دوان..

              نە سیان..

چها شەون

وەکوو تاکتاککەرەی ماندوو

دەست بە کەڵکیت

چاو لەسەر ڕایەڵەی تەون

ماندوو و شەکەت

تا شەو درەنگان ناخەون.

چها شەون

بە گژ هەژاریدا دەچن

پەنجەکانتان بە تانوپۆوە ناسرەون.

 

کچانی پەنجە نەخشینی وڵاتەکەم

کرێکارانی بێ حەقدەست

ئەو شەوانەی کە ئاوایی خەو دایدەگرێ و

تەنیا چاوی دەلاقەی دیوەکەی ئێوە ئاوەڵایە

تەنیا دڵی ژوورەکەی ئێوە لێدەداو

دەستی ئێوە لە کاردایە

ئەو شەوانەی دەنگی کەلکیتەکەی ئێوە هاوڕێی شەوە

کامەتان بیر دەکەنەوە

زیل و بەمی تان و پۆتان

سازی خەوی تاجرانە

ڕەنگی فەڕشی هەڵواسراوتان

خەونی سەوزی بازرگانە

کامەتان بە بیرتاندا دێ

ئاخۆ سبەی کامیانی پێ خەنی دەبێ

کێهە وەزیر لێرەو لەوێ

خۆی بە پەنجەی نەخشینی ئێوە ڕادەنێ؟!

ئاخۆ سبەی تابڵۆکەتان

لەپێتەختی کام وڵاتا

بە ڕاوێچکەی کێهە پاشا پێخوست دەبێ

نازی کام شاژن هەڵدەگرێ؟

 

بەڵام ئاخۆ بڵێی سبەی

 ساتەوەختێک

بیر و هزری کڕیارەکەی داگیر بکا تابڵۆکەتان

بڵێی خەونەکانی شاژن جارێ ئێوەش بگرێتەوە؟!

کێ دەزانێ

ئەوە بەرهەمی بەهاری جوانیتانە

بەری شەوانی ماندوویی و شەونخوونی

بەری ئازاری نەبوونی

کێ دەزانێ

بۆ ساتێ بە بیر کێدا دێ

بەهاری عومری ماندووتان

دەستی جومگە جەمام بووتان

چاوی ماندووی سۆما چووتان

ناوچەی مەهاباد – زستانی ١٣٧٤

دووی ڕێبەندان

 

گوڵبارانە کوردستانم بە کلووی بەفری سپی

ئاسمان ئاوریشمی خاو دادەوەرێنێ بە کپی

ڕێگە بەندانە بەڵام جێژنی سەری ساڵی مەیە

کە بە سەرماو سەخڵەتیش کۆشکی زۆردار تێکداتەپی

پیرەژن داخی نەما، گەورە و بچووک دڵخۆشن

خەمی جێ هێشت پیرەپیاو، هاتەوە بیر گاڵتەو گەپی

بوو بە پەلکە زێڕینە کیژی جوانی ڕەشبەڵەک

دەگەڕێ شەوگەڕی داوەت بە سێپێیی و بە چەپی

کیژە کوردی براکوژراو دەچتە سەر گۆڕی شەهید

دەکا یادی نەمرانی بە گوڵاڵەی نێو لەپی

دایک و باوکی ڕۆڵە کوژراو برینیان دێتەوە سۆ

کوڕی تر ڕادەماڵن ئەو زۆریەی دادەسەپی

عەبا و عەممامەی دەسووتێن لەتۆڵەی خاکی وڵات

دەپژێ کەللەیی زۆردار، دەشکێ لاقی بە شەپی

نامێنێ زاڵمی بەدفەڕ، تێیدەقووچێنن گزیر

ڕادەکەن پۆلە وەزیر جا چ لە ڕاست و چ چەپی

چەکی پێشمەرگە ئەوا دادەدڕێ پەردەی شەو

وەرنە سەیری هەیبەت و کۆڕژن و حیلەی ئەسپی

٢٣/١٠/١٣٧٣ کۆیە

ڕاز

 

ئەو ڕۆژەی بووی بە دڵدارم

تۆوی شێعرێک بوو کە داتچاند

لە جەرگەی دڵی زامدارم

ئێستا لێرە ئەگەر سنوور

بەربەستی عەشقی ئێمەیە

نەمامی ئەو شێعرەی ناشتت

سەوز بووە و زۆر گەورەیە

ئەو بە تەنێ

مەحرەمی ڕازی ئێمەیە

کۆیە – خەزەڵوەری ١٣٧٣

بۆ شەهید سەلاحی ڕەزایی

 

کڵاوێکی پێشمەرگانە بە سەرەوە

 جامانە بە دەوری ملدا

بیکەیسی بە سەر شانەوە

فیشەکدانی لێ شەتەک دا

دەبڕێ سنوور بە ئازایی

هاوڕێ سەلاحی ڕەزایی

         ***

دڵێک پڕ لە هیوا و بڕوا

قولێک تراکت لە ناو مستا

کۆڵەپشتی پڕ لە دەوا و

کەڵاشینکۆف لە ناو دەستا

وا هەڵکشا بەرەو لوتکە و

                       ڕانەوەستا

مامۆستا سەلاحی دوکتور

دوکتور سەلاحی مامۆستا

            ***

لە داوێنی مەیدانچۆغە

تا هەتایە خاکی بەرگە

ڕێبازی ڕێی خەباتمانەو

گڵکۆی دەکەین بە نزرگە

مامۆستا سەلاحی دوکتور

شەهید سەلاحی پێشمەرگە

ناوچەی مەهاباد – گەلاوێژی ١٣٧٣

بۆ شەهید عەبدوڵڵای شەریفی

 لە شەوێکی ئەنگوستەچاو

کە سۆمایی نێو چاوانی هەموومان بووی

بە دوانیگای مۆلەق وەستاو

ماڵاواییت کرد و ڕۆییشتی.

 

لەم شەوگارە تاریکەدا

بۆ پێشمەرگە

پێشەنگی رێی سەخت و دژوار

بۆ  هەژاران

هێزی خەبات و وزەی کار

بۆ جووتیاران

وەک بارانی پەڵەی بەهار

لە ناو زانکۆش

ببووی  بە قەڵەمی خوێندکار

ماڵاواییت کرد و رۆیشتی.

 

داد لە دەست ئەم شوومە شەوە

هەر دەڕۆین و نابڕێتەوە

بە دەم فرمێسک و تاسەوە

بەسەر پشتی تەرازوان و مێرخاسەوە

تەرمی لە خوێندا شەڵاڵی مێرخاسێکمان بە کۆڵەوە

دەڕۆین و دڵ بە داخەوە

شین دەگێڕین لە ناخەوە

 

بە ڕیز.. خەمناک..ڕێگە دەبڕین

لوولەی چەکمان داشۆڕاوەو

                      کاس و وڕین

بەو داخەوە داخ کراوین

داسووی شەو لە چاوی داوین

هەر نازانین لە کام لاوە ئەنگواوین..

 

چاومان بۆ هەر کوێ دەگێڕین

بیرەوەریی تۆ دەبینین

رێچکه‌ نییە شوێن پێڵاوی تۆی لێ نەبێ

بن به‌رد نییه‌

 سه‌نگه‌رت لێ نەگرتبێ

لوتکه‌ نییه‌

ئێواره‌یه‌ک نەتگرتبێ‌و

 به‌ دووربینه‌که‌ی سه‌ر سینگت

مه‌ودای که‌وشه‌نی نه‌بڕیبێ 

تێپه‌ڕبوونت نیشانی ئێمه‌ نه‌دابێ.

 

بێدەنگ.. بێدەنگ

بۆ مەرگی رێبەرێک دەگرین

ئازایانە دەژیا بۆ ژین

لەگەڵ ئاسمان

فرمێسکی بەسەردا دەڕێژین

لەگەڵ پاییز

دەردی جودایی دەچێژین

دەیبەین تا لە بناری وڵات

نا...

لە
نێو دڵدا

                دەینێژین  

ناوچەی بانە - ڕەزبەری ١٣٧٣