کچی عەنکاوە ئەگەر حۆر و پەرین هەموو هەر خادمی بەر ماڵی پەرین
ڕاستە ئیغڕاقە بەڵام دیتوومە لەشی ڕێک و کەمێ گۆشتن، مەڕمەڕین
نە هەر من زۆرین لە دەوری شەمی ڕووی بووینە پەروانە کەچی بێ سەمەرین
هەڵوەداین و هەموو دوورە وەتەنین بە ئەوینی سەرلەنوێ دەربەدەرین
خۆ ئەگەر تۆزێ زمانی پسکە هیندە شەیداین هەموو لێی بێخەبەرین
لە حزوور باوکیدا دەستەونەزەرین بۆ پەری گشت نۆکەری پیاوی کەرین
گرینگ نییە کەوا ئەمڕۆ
لەچاوی پڕ تاسەم ونی
گرینگ نییە کەوا ئەمڕۆ
من چیاییم
تۆش نیشتەجێی شاری وەک بەحری
بێ بنی
ئەمێستاش یادەکانی تۆ
تاکە هاودەمی شەوانی تەنیاییمن
ئەمێستاش نامەکانی تۆ
نێوئاخنی کەشکۆڵەکەی چیاییمن
ئێستاش ئازادیی تۆ و وڵات
خولیای سەری سەواییمن
گرینگ نییە
ئەوانە هیچیان گرینگ نین
ئەوێستاش تۆم
وەکوو باخ و بەهار و بەیان
خۆش دەوێ
ئێستاش خەیاڵی تۆم نەبێ
خەو لە چاوانم ناکەوێ
لە چی تۆراوی گیانەکەم
خۆ من ئێستاش هەر ئامادەم
ڕێی مەدرەسەت بگرمەوە
لە نێو بەفر و سەهۆڵبەندانی
شارەکەت
لە نیونیگای ژێر مەقنەوە
باوەشێک گوڵ بچنمەوە
وەکوو دیاری بۆ دەفتەری تاسەباری
شێعرەکانمی بەرمەوە.
تووڕە مەبە
دەمێکە پەنجەرەکەم
چاوەڕێی تیشکی هەتاوە
وەرەوە و بەم نیوەشەوە
بە پێخەفی بسکی سەوزت
دامپۆشەوە
سا وەرەوە و
لە بەر تینی ئاگردانی شێعرەکانم
زستان لەبیر بەرینەوە
کە هاتییەوە
بە ودمی هەناسەی ئەوین
گۆرانی نوێ بۆ ژینی نوێ دەچڕینەوە..
کۆیە بەهاری ١٣٧٦
پەشیمانم
لە
عەشقی تۆ پەشیمانم
لەو
فرمێسکانەی بۆ تۆم ڕشت
دەمەوێ
کە دڵۆپ.. دڵۆپ..
بیانڕێژمەوە
نێو چاوانم
پەشیمانم
لە بینینت
لە ناسینت
لە ئەوینت
لە ناوت
لە ناوەرۆکت
لەو
وشانەی کە ڕۆژگارێک دەتهاویشتە سەر زمانم
پەشیمانم..
چلۆن
بیڵێم تا تێبگەیت و تێنەگەی
ئەوینی
تۆ کاسەی شەراب و ژەهر بوو کە من چێشتم
لە
مابەینی مەستی و مەرگا پەشیمانم
ئەوینی
من
-
فەرهادئاسا
-
کوتکی
بە بێستوون دادەدا
سەحرای
بە مەجنوون تەی دەکرد
بۆ
نەمانی مۆتەکەی شەو
درەنگ
زانیم
بوومە
گاڵتەجاڕی دەستی
شیرینی
چاومەستی چاوبەست
حاشا
لە تۆش و تف لە ئەو
لە
پەیمانم
پەشیمانم...
کۆیە - ڕەشەممەی ١٣٧٥
کۆترەکانی وشەی نالی
ئەگەر لەسەر گومبەزی مەمکی حەبیبە هەڵنەنیشتبان
دەبوایە خۆی باڵیان بکا و
بیانکاتە دیاری بۆ پاشا
خانی ئەگەر
باڵای زینی لە وشە دانەتاشیبا و
نەیبردبا بۆ ژوانی مەم
ڕۆحی وەبەر ژوان نەنابا
دەبوو شێعری بکا بە مەیتەری ئاغا
ئێستا منیش
ئەی وڵاتە شیرینەکەم!
ئەگەر
شێعرم نەکەم بە ڕێژنە باران و
بەسەر
کێڵگەی هەڵقرچاوتا نەیبارێنم
دەبێ
مەتحی شەمشەمە کوێرەی پێ بکەم.
جیاوازیی
تۆ لەوەدایە
حەبیبە
مرد و بەتەنها
پەیکەری
لە شێعری نالیدا مایەوە و
ڕۆحی
لە خەیاڵی ئەودا
مەم
ڕۆی و
زین
ڕۆی و
شۆفاریش
چوو
ئەوەی
کە ما
عەشقی
مەمە و
باڵای
زینە و
ڕووخساری
شوومی شۆفارە
بەڵام
تۆ ئەی وڵاتە شیرینەکەم
شێعرم
لە ئامێزی تۆدا ببێ و نەبێ
تۆ
هەر هەی و هەر دەشمێنی
ئەوە
تەنها شێعری منە
وەکوو
گیا و گوڵ
بە
ڕەوەزەکانی تۆوە ڕادەوەستێ
کۆیە-
١٠/١/١٣٧٥
پێم نەوتی؛ دەستت بخەرە ناو دەستم؟!
شەو تاریکە با هەڵنەبڕێی
تەوەللابوونت گرانە
زامی دووریت بێ دەرمانە.
نەموت تۆ لەگەڵیان مەڕۆ؟!
ئەوانە گشت هاوڕێی ڕۆژ و جەردەی شەون
هەڵاتووی دەستی ڕۆژگارن
بۆ تاریکی ڕێ دەکەون.
گوڵم ئێستاش درەنگ نییە
مەڕۆ و باڵات بە باڵای شوومی وان مەبڕە
نەکا ڕۆژێ بە قاچاخی دەتبینمەوە
شلکە نەمامی باڵاکەت
کەوتبێتە ژێر چارشێوی ڕەشی خاوەنماڵ
لە تیشکی چاوی سەرشێتم بێ بەریت کەن
دەستەونزا ڕابوەستم
تاکو چارشێو لەسەر باڵای تۆش ڕاماڵێ شنەی شەماڵ
مەڕۆ..مەڕۆ
دەستت بخەرە ناو دەستم
شەو تاریکە با هەڵنەبڕێی
تەوەللا بوونت گرانە
زامی دووریت بێ دەرمانە
لەگەڵ ئەوان
بۆ کوێ بچی و لەهەر کوێ بی
هەمان ڕەنگ و هەمان شکڵە
ئەم
ئاسمانە
فێرگەی حیزب ٢٩/٧/١٣٧٥
پەنجەرەکەم
تەمی هەناسەی هەناومی لێ نیشتووە
سارد بۆتەوە و
بە سەر شووشە ناسکەکەیدا
وەک فرمێسکی سەر ڕوومەتی
کیژۆڵەیەکی دڵ بە سۆ
هۆن هۆن دادەڕژێتە خوارێ
لە دەرەوە؛
زەوی بە تیشکی ساردی خۆر
داپۆشراوە
من دەمێکە
چاوەڕوانی دابارینی تا
ئەژنۆیان بەفر دەکەم
دە با چیتر کێڵگەکانمان بە وشکە سەرما سڕ نەبن
١٣٧٥
* دژ بە شەڕی ناوخۆ لە باشوور نووسراوە
لەمبەر ئەوبەری قەرەچووخ
دوو لەشکری ڕەشی هەور لە سان
دران
شاخ پێکەنی
کانی مەستی بادەی باران
زەوی بە تەمای ساڵێکی پڕ فەڕ
و هات
داوەتیان گرت
بەڵام هەورەکان نەزۆک بوون
لە مەمکی قوت و بەتاڵیان
تاکە دڵۆپێکیش نەهات
١٣٧٥ کۆیە
* دژ بە شەڕی ناوخۆ نووسراوە
شلێرۆکە قژ کاڵی من
ئەی چاوشینی خنجیلانە
گەر هاتمەوە
بەرلەوەی کە ئامبازم بی
بەرلەوەی کە
باسکی ناسکی مناڵانەت
لە دەوری ئەژنۆم وەرێنی
خەندەی شیرینی مناڵیت
بە گوێچکەما بچرپێنی
پێم خۆشە مەینەت و ژانی ڕۆژانی دووریت بۆ باس کەم.
بەرلەوەی کە
بۆنی بسکی سەوزت بکەم
گوێ بۆ قسەی شیرینی مناڵیت شل کەم
بە بەژنی وردت هەڵبڵێم
لە دەریای فرمێسکی دووریی خۆم بۆت دەدوێم.
شلێرۆکی قژ زەردی من
ئەی ناسکتر لە شێعری زەردە زێڕینە
گەر هاتمەوە
پێش هەموو شت بیرم خەوە
بۆ یەکەم جار
باسی ئەمڕۆمت بۆ بکەم
کە شێعری زەردە زێڕینەم هاتە سەر زار
کۆیە – ٢٢/١٢/ ١٣٧٤
نە دوان..
نە سیان..
چها شەون
وەکوو تاکتاککەرەی ماندوو
دەست بە کەڵکیت
چاو لەسەر ڕایەڵەی تەون
ماندوو و شەکەت
تا شەو درەنگان ناخەون.
چها شەون
بە گژ هەژاریدا دەچن
پەنجەکانتان بە تانوپۆوە ناسرەون.
کچانی پەنجە نەخشینی وڵاتەکەم
کرێکارانی بێ حەقدەست
ئەو شەوانەی کە ئاوایی خەو دایدەگرێ و
تەنیا چاوی دەلاقەی دیوەکەی ئێوە ئاوەڵایە
تەنیا دڵی ژوورەکەی ئێوە لێدەداو
دەستی ئێوە لە کاردایە
ئەو شەوانەی دەنگی کەلکیتەکەی ئێوە هاوڕێی شەوە
کامەتان بیر دەکەنەوە
زیل و بەمی تان و پۆتان
سازی خەوی تاجرانە
ڕەنگی فەڕشی هەڵواسراوتان
خەونی سەوزی بازرگانە
کامەتان بە بیرتاندا دێ
ئاخۆ سبەی کامیانی پێ خەنی دەبێ
کێهە وەزیر لێرەو لەوێ
خۆی بە پەنجەی نەخشینی ئێوە ڕادەنێ؟!
ئاخۆ سبەی تابڵۆکەتان
لەپێتەختی کام وڵاتا
بە ڕاوێچکەی کێهە پاشا پێخوست دەبێ
نازی کام شاژن هەڵدەگرێ؟
بەڵام ئاخۆ بڵێی سبەی
ساتەوەختێک
بیر و هزری کڕیارەکەی داگیر بکا تابڵۆکەتان
بڵێی خەونەکانی شاژن جارێ ئێوەش بگرێتەوە؟!
کێ دەزانێ
ئەوە بەرهەمی بەهاری جوانیتانە
بەری شەوانی ماندوویی و شەونخوونی
بەری ئازاری نەبوونی
کێ دەزانێ
بۆ ساتێ بە بیر کێدا دێ
بەهاری عومری ماندووتان
دەستی جومگە جەمام بووتان
چاوی ماندووی سۆما چووتان
ناوچەی مەهاباد – زستانی ١٣٧٤
گوڵبارانە کوردستانم بە کلووی بەفری سپی
ئاسمان ئاوریشمی خاو
دادەوەرێنێ بە کپی
ڕێگە بەندانە بەڵام جێژنی
سەری ساڵی مەیە
کە بە سەرماو سەخڵەتیش کۆشکی
زۆردار تێکداتەپی
پیرەژن داخی نەما، گەورە و
بچووک دڵخۆشن
خەمی جێ هێشت پیرەپیاو،
هاتەوە بیر گاڵتەو گەپی
بوو بە پەلکە زێڕینە کیژی
جوانی ڕەشبەڵەک
دەگەڕێ شەوگەڕی داوەت بە سێپێیی
و بە چەپی
کیژە کوردی براکوژراو دەچتە
سەر گۆڕی شەهید
دەکا یادی نەمرانی بە
گوڵاڵەی نێو لەپی
دایک و باوکی ڕۆڵە کوژراو برینیان دێتەوە سۆ
کوڕی تر ڕادەماڵن ئەو زۆریەی
دادەسەپی
عەبا و عەممامەی دەسووتێن لەتۆڵەی
خاکی وڵات
دەپژێ کەللەیی زۆردار، دەشکێ
لاقی بە شەپی
نامێنێ زاڵمی بەدفەڕ،
تێیدەقووچێنن گزیر
ڕادەکەن پۆلە وەزیر جا چ لە
ڕاست و چ چەپی
چەکی پێشمەرگە ئەوا دادەدڕێ
پەردەی شەو
وەرنە سەیری هەیبەت و کۆڕژن
و حیلەی ئەسپی
٢٣/١٠/١٣٧٣ کۆیە
