کێشەیەکی زۆربەی گۆرانیبێژە لاوەکانمان ئەوەیە کە تێکستی گۆرانی ناناسن یان سەرنج بە نێوەرۆک و شێعری گۆرانی نادەن. هۆکارەکەش ئەوەیە کە مۆسیقا و گۆرانی لە هونەری دەربڕینی هەست و سۆزی گۆرانیبێژ و جەماوەر و کۆمەڵگەکەیەوە بوون بە کەرەسەیەکی بازاڕی و بە سەرچاوەی پارە پەیدا کردن و خۆ دەوڵەمەند کردنی گۆرانیبێژ. ئیتر ئەوەیە کە هەستی خۆیان ئاوێتەی تێکست و ئاواز ناکەن و گۆرانیی پێشینیانی خۆیان وەک تووتی و زۆر جار پڕ لە هەڵە و پەڵە دەڵێنەوە. ئەم کێشەیە بەتایبەت لای کچە گۆرانیبێژەکان زیاترە کە ڕەنگە لەبەر ئەوە بێ ڕمێنیان زیاترە و بازاڕیان قەوغاترە. ئەوان کە زۆربەی جاران گۆرانیی گۆرانیبێژانی پێشتر یان گۆرانییە فۆلکلۆرییەکان دەڵێنەوە، سەرنج بەوە نادەن کە تێکستی زۆربەی ئەم گۆرانیانە پیاوانەیە و دەربڕی هەستی دڵی پیاوێکی ئەویندار بە ژنێکە. کێشەکە ئەم ڕۆژانە لە خاتوونێکی گۆرانیبێژ بە ناوی سەنا بەرزنجی ئاشکرا بووە و داوێنی باوکیشی گرتوەتەوە. بەدەر لە هەلپەرەستیی ئیسلامییەکان، زۆربەی گۆرانییەکانی ئەحمەد شەماڵ هی ئەوە نین کە کچۆڵەیەک بتوانێ ئەو گۆرانیانە لەگەڵ هەستی ژنانەی خۆی ئاوێتە بکا یان باوکێک بتوانێ هەستی خۆشەویستیی باوکانەی خۆی بۆ کچەکەی پێ دەربڕێ. باوکەکە دوای ئەو هەموو ڕەخنە بەجێ یان بێ‌جێیانەش، هێشتا دوو قڕانییەکەی نەکەوتووە و شێعری "کچ"ی نالی کە لە ڕاستیدا دژ بە هاوڕەگەزخوازی و نێربازی نووسراوە، بە بەڵگە هێناوەتەوە تا هەستی خۆشەویستیی باوک و کچانەی خۆی لە گۆرانییەکدا کە گۆرانیبێژ بە سینگ و مەمکی یارەکەیدا هەڵدەڵێ، پێ پاساو بدا؛
کوڕ زیبی دەبوستانە، کچ شەمعی شەبوستانە
بۆ بەزمی تەماشا کوڕ، بۆ خەڵوەتی تەنها کچ
کوڕ ئاینەیی حوسنی، تا وەک کچە، مەنزوورە
گرتی کە غوباری موو؛ چینی کوڕ و مینا کچ
دیارە لەنێو گۆرانییە فۆلکۆرییەکاندا زۆر گۆرانیش هەن کە گۆرانیی ژنانە و دەربڕی هەستی ئەوانن بەڵام بەداخەوە خانمە گۆرانیبێژەکان بە دەگمەن وا هەیە خۆیان بە خوێندنەوە و بەدواداچوون و دۆزینەوەی ئەوانە ماندوو بکەن.
ئەوە نموونەیەک لە گۆرانیی ژنانە بە دەنگی زیرەکی نەمر. دیارە زیرەک لەو گۆرانییەدا، لە غیابی ژنان خۆیاندا و لە سەردەمێکدا کە ژن لە سەرەتاییترین مافی خۆی کە مافی هەڵبژاردنی هاوسەری داهاتوویەتی، بێببەش کرابوو، بووە بە دەنگی ژنان بۆ گەیاندنی هاواری ئازادیخوازانەی ئەوان؛
هەی ناکەم ناکەم، ئەو کارەی ناکەم
کابرا زۆر پیرە و مێردی پێ ناکەم
ئازادیی ژنانە و بە دڵێ خۆم دەکەم
